የሳዑዲ አረቢያ የአገር ውስጥ ጉዳይ ሚኒስቴር ለ1447 ሂጅራ የሐጅ ወቅት ዝግጅትና ለሐጃጆች ደህንነት ሲባል የሐጅ ፈቃድ የማግኘት መመሪያን በሚጥሱና እንዲጥሱ በሚያመቻቹ ሰዎች ላይ የሚጣሉ ቅጣቶችን አስታውቋል።

የመጀመሪያው ምድብ እስከ 20,000 ሪያል የገንዘብ ቅጣት ነው። ይህም ያለ ፈቃድ ሐጅ ሲያደርግ ወይም ለማድረግ ሲሞክር የተያዘን ሰው እንዲሁም ከዙል ቃዕዳ 1 እስከ ዙል ሂጃ 14 መጨረሻ ድረስ ወደ መካ ከተማና ቅዱሳን ስፍራዎች የገባ፣ እዚያ የቆየ ወይም ለመግባት የሞከረ ማንኛውንም ዓይነት የጉብኝት ቪዛ ያለውን ሰው ይመለከታል።

ሁለተኛው ምድብ እስከ 100,000 ሪያል የገንዘብ ቅጣት ነው። ይህም ያለ ፈቃድ ሐጅ ላደረገ ወይም በዚሁ ጊዜ ወደ መካና ቅዱሳን ስፍራዎች ለገባ ሰው የጉብኝት ቪዛ ያመለከተን፣ የጉብኝት ቪዛ ያላቸውን ወደዚያ ያጓጓዘን ወይም ለማጓጓዝ የሞከረን፣ እንዲሁም በሆቴል፣ በአፓርትመንት፣ በግል መኖሪያ ወይም በሐጃጆች ማረፊያ ያስጠለላቸውን፣ የደበቃቸውን ወይም እንዲቆዩ የረዳቸውን ሰው ይመለከታል። ቅጣቱ እንደ ሰዎቹ ብዛት ይደጋገማል።

በተጨማሪም ያለ ፈቃድ ለሐጅ ሰርገው የገቡ ነዋሪዎችና የቪዛ ጊዜያቸውን ያሳለፉ ሰዎች ወደ አገራቸው ይመለሳሉ፤ ለ10 ዓመታትም ወደ መንግሥቱ እንዳይገቡ ይከለከላሉ። በዚሁ ጊዜ የጉብኝት ቪዛ ያላቸውን ለማጓጓዝ መዋሉ የተረጋገጠ የየብስ ተሽከርካሪ የአጓጓዡ፣ የተባባሪው ወይም የተመሳጠረው ሰው ንብረት ከሆነ እንዲወረስ ፍርድ ቤት ይጠየቃል።

ሚኒስቴሩ ቅጣት የተወሰነበት ሰው ውሳኔው በደረሰው በ30 ቀናት ውስጥ ለሚመለከተው ኮሚቴ ቅሬታ ማቅረብ፣ የኮሚቴውን ውሳኔ ደግሞ በ60 ቀናት ውስጥ በአስተዳደር ፍርድ ቤት መቃወም እንደሚችል ገልጿል።

ሚኒስቴሩ ዜጎች፣ ነዋሪዎችና ሁሉም ዓይነት ቪዛ ያላቸው ሰዎች የሐጅ መመሪያዎችን እንዲያከብሩና በመካ ክልል ጥሰቶችን በ911 እንዲጠቁሙ ጥሪ አቅርቧል።