በሳዑዲ አረቢያ ሕጋዊ ባልሆነ መንገድ የሚኖሩ የመናውያን በሙሉ የመኖሪያ ሁኔታቸው እንደሚስተካከል የአገር ውስጥ ሚኒስቴር አስታወቀ

የሳዑዲ ፕሬስ ኤጀንሲ (ኤስፒኤ) እንደዘገበው፣ የሳዑዲ አረቢያ የአገር ውስጥ ጉዳይ ሚኒስቴር በመንግሥቱ ውስጥ ሕጋዊ ባልሆነ መንገድ የሚኖሩ የየመን ዜግነት ያላቸውን ሰዎች በሙሉ የመኖሪያ ሁኔታ የማስተካከል ሂደት መጀመሩን አስታውቋል። ውሳኔው የተላለፈው የሁለቱ ቅዱሳን መስጊዶች ጠባቂ ንጉሥ ሳልማን ቢን አብዱልአዚዝ አል ሳዑድ በሰጡት መመሪያ ሲሆን፣ መመሪያውም የየመን ፕሬዚዳንታዊ አመራር ምክር ቤት ሊቀመንበር ዶክተር ራሻድ መሐመድ አል-አሊሚ ላቀረቡት ጥያቄ ምላሽ ነው።

ሚኒስቴሩ ሂደቱን ከውጭ ጉዳይ ሚኒስቴር፣ ከሰው ሀብትና ማኅበራዊ ልማት ሚኒስቴር እንዲሁም ከሳዑዲ የመረጃና ሰው ሰራሽ አስተውሎት ባለሥልጣን (ሰዳያ) ጋር በመተባበር ያከናውናል። ኤስፒኤ እንዳለው እርምጃው የሳዑዲ አመራር ለየመን ሕዝብ የሚያደርገው ቀጣይ ድጋፍና ወንድማዊ አቋም አካል ነው።

ሚኒስቴሩ ከዚህ ዕድል ተጠቃሚ ለመሆን የየመን ፓስፖርት መያዝ ግዴታ መሆኑን ገልጿል። ሂደቱ የሚጀመርበት ቀንና መመሪያዎቹ በፓስፖርት ጠቅላይ ዳይሬክቶሬት (ጀዋዛት) እና በሚመለከታቸው አካላት ይፋዊ ገጾች እንደሚገለጹም አስታውቋል።

ውሳኔው የሚመለከታቸው ሰዎች በእነዚህ ይፋዊ ምንጮች በሚወጡ መረጃዎች ላይ ብቻ መተማመን ይኖርባቸዋል።