سعودی عرب کا ایک امدادی طیارہ مختلف نوعیت کی امدادی اشیا لے کر گزشتہ روز نیپال پہنچا۔ یہ پرواز شاہ سلمان مرکز برائے امداد و انسانی خدمات نے خادم حرمین شریفین شاہ سلمان بن عبدالعزیز آل سعود اور ولی عہد و وزیر اعظم شہزادہ محمد بن سلمان بن عبدالعزیز آل سعود کی ہدایات پر روانہ کی۔

طیارے کا استقبال کرنے والوں میں نیپال کے وزیر برائے سائنس، ٹیکنالوجی و اختراع مہابیر پن، نیپال میں سعودی سفیر فہد بن محمد بن منیخر اور نیپالی وزارت خارجہ میں وسطی و مغربی ایشیا اور وسطی افریقہ ڈویژن کے ڈائریکٹر شامل تھے۔

مرکز کی ایک ماہر ٹیم متعلقہ اداروں کے ساتھ مل کر امداد کی تقسیم کو منظم کرے گی تاکہ یہ حالیہ سیلاب سے متاثرہ افراد تک پہنچ سکے۔ ان سیلابوں نے نیپال میں بھاری جانی و مالی نقصان پہنچایا ہے۔

نیپالی حکومت کے نمائندے نے اس تعاون پر سعودی قیادت کا شکریہ ادا کیا اور کہا کہ یہ دونوں ممالک کی گہری دوستی کا مظہر ہے۔

سفیر بن منیخر نے کہا کہ یہ امداد قدرتی آفات کے انسانی اثرات سے نمٹنے میں دوست ممالک کے ساتھ کھڑے ہونے کے سعودی عزم کی عکاسی کرتی ہے اور بین الاقوامی انسانی خدمات میں مملکت کے قائدانہ کردار کو نمایاں کرتی ہے۔