የሳዑዲ ፕሬስ ኤጀንሲ (SPA) እንደዘገበው፣ የንጉሥ ሳልማን ሰብአዊ ርዳታና የእርዳታ ማዕከል (KSrelief) ከሳዑዲ የባህልና ቅርስ ማዕከል ጋር በቪዲዮ ኮንፈረንስ የጋራ የትብብር ስምምነት ተፈራርሟል። ስምምነቱ በጋዛ ሰርጥ ዴር አል-በላሕ ከተማ «የሪያድ ሞዴል ትምህርት ቤት»ን ለማቋቋምና ለማስተዳደር ያለመ ነው።

ስምምነቱን የማዕከሉ የኦፕሬሽንና ፕሮግራሞች ረዳት ዋና ተቆጣጣሪ ኢንጂነር አሕመድ ቢን ዓሊ አል-በይዝ እና የሳዑዲ የባህልና ቅርስ ማዕከል የቦርድ ሰብሳቢ ዶ/ር ዒሳም ፈትሒ ሱለይማን አቡ ኸሊል ፈርመውታል።

ፕሮጀክቱ በጋዛ ሰርጥ በጦርነቱ ለተጎዱ ሕፃናት መሠረታዊ ትምህርት እንዲቀጥል አስተዋጽኦ ለማድረግ ያለመ ነው። ትምህርት ቤቱ ከአንደኛ እስከ ስድስተኛ ክፍል ያሉ 720 ወንድና ሴት ተማሪዎችን የሚያስተናግድ ሲሆን፣ በአካባቢው ያለውን ሁኔታ ከግምት በማስገባት በቀን በሁለት ፈረቃ ያስተምራል።

ፕሮጀክቱ ትምህርት ቤቱን ማደራጀት፣ የመማሪያ ክፍሎችን፣ የቤት ዕቃዎችንና የትምህርት መርጃዎችን ማቅረብ፣ የጥገና ሥራዎችን ማከናወን እንዲሁም ውኃ፣ የፍሳሽ ማስወገጃ፣ የፀሐይ ኃይል፣ ኢንተርኔት፣ የአየር ማናፈሻና የክትትል ካሜራዎችን የመሳሰሉ መሠረታዊ አገልግሎቶችን ማሟላትን ያካትታል። ለሕፃናቱ የሥነ ልቦና ጤናና ማኅበራዊ መረጋጋት የቡድንና የግል ክፍለ ጊዜዎች እንዲሁም ለዕድሜያቸው የሚመጥኑ የመዝናኛና የትምህርት እንቅስቃሴዎች ይዘጋጃሉ።

ፕሮጀክቱ በትምህርት፣ በአስተዳደርና በአገልግሎት ዘርፎች 22 የሥራ ዕድሎችን የሚፈጥር ሲሆን፣ ከተማሪዎችና ከመምህራን ቤተሰቦች 3,715 ሰዎች ተጠቃሚ ይሆናሉ። ስምምነቱ ማዕከሉ በተጎዱ አካባቢዎች የትምህርት ዘርፍን ለመደገፍና በጦርነቱ ለተጎዱ ሕፃናት ደኅንነቱ የተጠበቀና ዘላቂ የመማሪያ ከባቢ ለመፍጠር የሚያደርገው ጥረት አካል ነው።