በሳዑዲ ዓረቢያ የእስላማዊ ጉዳዮች፣ የዳዕዋና የመመሪያ ሚኒስቴር የሚተገበረው የሁለቱ ቅዱሳን መስጊዶች አገልጋይ የዑምራና የዚያራ ፕሮግራም አራተኛ ቡድን አባላት የሆኑ በርካታ እንግዶች መዲና ከደረሱበት ጊዜ ጀምሮ ላገኙት አቀባበል፣ መስተንግዶና እንክብካቤ ምስጋናቸውን አቅርበዋል። ለሁለቱ ቅዱሳን መስጊዶች እንግዶች ትኩረት በመስጠቱም የመንግሥቱን አመራር አመስግነዋል።

ከፓኪስታን የመጡት መሐመድ ያዕቆብ ዑበይዱላህ በመዲና በሚገኘው የልዑል መሐመድ ቢን አብዱልአዚዝ ዓለም አቀፍ አውሮፕላን ማረፊያ የነበረው አሠራር ቀልጣፋ መሆኑን አድንቀው፣ መልካሙ አደረጃጀት መንግሥቱ ለእንግዶች ምቾት የሚሰጠውን ትኩረት ያሳያል ብለዋል። የአገራቸው ሰው ሐፊዝ ናስሩዲን ፈቂርም ሞቅ ያለው አቀባበል ገና ከመጀመሪያው ቅጽበት በቤተሰቦቻቸውና በወንድሞቻቸው መካከል እንዳሉ እንዲሰማቸው እንዳደረገ ገልጸዋል።

ሌላው የፓኪስታን እንግዳ ሑዘይፋ ፈሪድ ከሳዑዲ ዓረቢያና ከሁለቱ ቅዱሳን መስጊዶች ጋር ያለው መንፈሳዊ ትስስር በፓኪስታን ሕዝብ ልብ ውስጥ ሥር የሰደደ መሆኑን ተናግረዋል። ጉዞው ከተጀመረበት ጊዜ አንሥቶ የልዑካን ቡድኑ አባላት በናፍቆትና በደስታ ተሞልተው እንደነበርና መዲናንና መካን መጎብኘት ለሙስሊሞች ውድ ምኞት መሆኑንም አክለዋል።

ከታጂኪስታን የመጡት ሱለይማን ቁርባኖቭ ለፕሮግራሙ መመረጣቸውን ታላቅ ጸጋ ብለው የገለጹት ሲሆን መዲናን የመጎብኘት ምኞታቸው በመሳካቱ መደሰታቸውንና ዑምራን ለመፈጸም መጓጓታቸውን ተናግረዋል፤ ጉዞውም በሕይወታቸው ውድ ትዝታ ሆኖ እንደሚቀር ገልጸዋል። ከባንግላዲሽ የመጡት መሐመድ ተንቪሩል ኢስላም ፕሮግራሙ መንግሥቱ ለእስልምናና ለሙስሊሞች የሚሰጠውን እንክብካቤና ሁለቱን ቅዱሳን መስጊዶች የማገልገል ተልዕኮውን የሚያንጸባርቅ እንዲሁም በሙስሊም ሕዝቦች መካከል የፍቅርና የወንድማማችነት ትስስርን የሚያጠናክር ነው ብለዋል።

እንግዶቹ ሚኒስቴሩ ላቀረባቸው አገልግሎቶችና ምቹ ሁኔታዎች ምስጋና አቅርበው፣ የተመለከቱት መልካም አደረጃጀት በልባቸው ለዘለቄታው እንደሚቀር ገልጸዋል፤ ለመንግሥቱና ለአመራሩም ደኅንነትና መረጋጋት እንዲዘልቅ ዱዓ አድርገዋል።