سعودی عرب، ترکیہ اور پاکستان نے مکہ مشترکہ دفاعی معاہدے کے تحت اپنے تعاون کو ادارہ جاتی شکل دینے کے لیے مزید اقدامات پر اتفاق کیا ہے، جن میں سب سے نمایاں مملکت میں ایک سیکرٹریٹ کا قیام ہے جس کی سربراہی ایک سیکرٹری جنرل کرے گا۔ ابتدائی مرحلے میں تین سال کی مدت کے لیے یہ ذمہ داری پاکستان کے سیکرٹری جنرل کے پاس ہوگی۔

یہ اعلان معاہدے کے تحت قائم اسٹریٹجک سیاسی و دفاعی کمیٹی کے مشترکہ اعلامیے میں کیا گیا، جو 31 اگست 2026 کو استنبول میں تینوں ممالک کے وزرائے خارجہ و دفاع، دفاعی افواج کے سربراہان اور چیفس آف جنرل اسٹاف کے اجلاس کے بعد جاری ہوا۔

اعلامیے کے مطابق تینوں ممالک نے اپنی علاقائی ذمہ داریوں کے پیش نظر خطے میں پائیدار امن و استحکام کے لیے معاہدے کے تحت مل کر کام کرنے کے عزم کا اعادہ کیا اور کشیدگی میں کمی، تحمل اور بحرانوں کے پرامن حل کی کوششوں کی حمایت جاری رکھنے کا اعلان کیا۔

اعلامیے میں کہا گیا کہ طے شدہ اقدامات تینوں ممالک کی یکجہتی کو مضبوط کریں گے، اجتماعی دفاع اور ڈیٹرنس کی ساکھ اور مؤثریت کو یقینی بنائیں گے اور منصفانہ، جامع اور دیرپا امن کے لیے علاقائی کوششوں میں حصہ ڈالیں گے۔

تینوں ممالک مشترکہ سرگرمیوں کے ذریعے دفاعی صنعت میں قریبی تعاون، مشترکہ پیداوار اور ٹیکنالوجی کی ترقی سے اپنی دفاعی صلاحیتوں اور مسلح افواج کی ہم آہنگی کو فروغ دیں گے۔ اعلامیے کے مطابق معاہدے پر سنجیدہ ادارہ جاتی عمل درآمد علاقائی امن و استحکام میں بنیادی کردار ادا کرے گا۔