سعودی عرب کے قومی مرکز برائے آبی کارکردگی و کفایت ”مائی“ کے چیف ایگزیکٹو انجینئر فہاد بن حویزی الدوسری نے کہا ہے کہ پانی کی کارکردگی اور کفایت کے معیارات کی نگرانی اور ان کی پابندی سے متعلق تازہ ایگزیکٹو ضابطہ نگرانی کے نظام کو مضبوط بنانے اور مختلف شعبوں میں پانی کے استعمال کو زیادہ مؤثر بنانے کی جانب ایک ریگولیٹری قدم ہے۔ یہ بات سعودی پریس ایجنسی (ایس پی اے) نے بتائی۔

الدوسری کے مطابق 21 مارچ 2027 سے نافذ ہونے والا یہ ضابطہ نگرانی اور پابندی کا واضح فریم ورک فراہم کرتا ہے، کرداروں اور ذمہ داریوں کا تعین کرتا ہے اور خلاف ورزیوں کی نشاندہی اور انہیں متعلقہ اداروں کو بھیجنے کا طریقۂ کار طے کرتا ہے۔

انہوں نے کہا: ”پانی کے استعمال کی کارکردگی بڑھانا صرف معیارات طے کرنے تک محدود نہیں، بلکہ اس کے لیے ایک واضح نظام درکار ہے جو ان پر عمل یقینی بنائے اور نفاذ کی نگرانی کرے۔“ ان کے مطابق یہ ضابطہ پانی کے ضیاع کو کم کرنے میں مدد دے گا۔

ضابطہ 15 دفعات پر مشتمل ہے جن میں دائرۂ کار، پابندی کے معیارات، مرکز اور متعلقہ اداروں کے کردار، خلاف ورزیاں اور حتمی احکام شامل ہیں۔ یہ شہری، زرعی اور صنعتی شعبوں کے علاوہ آبی کارکردگی کی خدمات فراہم کرنے والوں پر بھی لاگو ہوگا، اور سرکاری، نجی اور غیر منافع بخش شعبے کے تمام افراد اور اداروں پر اس کا اطلاق ہوگا۔

الدوسری نے بتایا کہ آئندہ مرحلے میں ضابطے کے دائرے میں آنے والوں کو اس کے نفاذ سے پہلے تیار کرنے پر کام ہوگا، جو واٹر قانون اور سعودی وژن 2030 کے اہداف کے مطابق ہے۔ وزیرِ ماحولیات، پانی و زراعت نے اس تازہ ضابطے کی منظوری 19/02/1448 ہجری کو دی تھی۔