سعودی پریس ایجنسی (ایس پی اے) کے مطابق وزارت انسانی وسائل و سماجی ترقی نے اپنی مسلسل نگرانی مہمات کے دوران بغیر لائسنس بھرتی (استقدام) اور لیبر خدمات فراہم کرنے والے 10 اداروں کو پکڑا ہے۔ ان مہمات کا مقصد قوانین کی پاسداری بڑھانا، غیر قانونی طریقوں کی روک تھام اور صارفین کے حقوق کا تحفظ ہے۔

وزارت نے بتایا کہ ان میں انفرادی ادارے، جنرل سروسز دفاتر اور ویب سائٹس و ایپس کے ذریعے خدمات دینے والے ادارے شامل تھے، جو براہ راست یا بالواسطہ بغیر لائسنس یہ کام کر رہے تھے۔ وزارت کے مطابق ان کے خلاف قانونی کارروائی کر کے مقررہ سزائیں نافذ کی گئی ہیں۔

نگرانی فیلڈ ٹیموں کے علاوہ ایپس، ڈیجیٹل پلیٹ فارمز اور سوشل میڈیا پر اشتہارات کی الیکٹرانک مانیٹرنگ، افراد اور اداروں کی شکایات اور سروس فراہم کنندہ کے لائسنس کی تصدیق کے ذریعے کی جاتی ہے۔

وزارت نے کہا کہ بغیر لائسنس یہ کام کرنا سنگین خلاف ورزی ہے، جس پر پہلی بار 200 ہزار ریال، دوسری بار 220 ہزار ریال اور تیسری بار 250 ہزار ریال جرمانہ ہے۔ یہ 21/8/1447ھ کے وزارتی فیصلہ نمبر 112377 کے تحت منظور شدہ خلاف ورزیوں اور سزاؤں کے جدول کے مطابق ہے۔

وزارت نے بتایا کہ متحدہ بھرتی پلیٹ فارم ’مساند‘ پر گھریلو ملازمین کی بھرتی اور خدمات کی منتقلی، ملازمین کے سی وی اور لائسنس یافتہ بھرتی دفاتر کی معلومات، اور معاہدوں سے منسلک الیکٹرانک ادائیگی کی سہولت موجود ہے، جس سے تمام فریقوں کے حقوق محفوظ رہتے ہیں۔

وزارت نے شہریوں اور مقیمین سے اپیل کی کہ گھریلو ملازمین کے تمام معاملات ’مساند‘ کے ذریعے کریں، بھرتی دفاتر کا لائسنس پہلے چیک کریں اور غیر لائسنس یافتہ اداروں یا دلالوں کی اطلاع 19911 پر یا وزارت کی ایپ کے ذریعے دیں۔