سعودی پروگرام برائے جڑواں بچوں کی طبی و جراحی ٹیم نے مراکش سے تعلق رکھنے والی جڑی ہوئی جڑواں بہنوں سجیٰ اور ضحیٰ کو کامیابی سے الگ کر دیا۔ یہ آپریشن ریاض میں وزارت نیشنل گارڈ کے کنگ عبدالعزیز میڈیکل سٹی میں واقع کنگ عبداللہ اسپیشلسٹ چلڈرن ہسپتال میں کیا گیا۔

ٹیم کے سربراہ، شاہی دیوان کے مشیر اور شاہ سلمان مرکز برائے امداد و انسانی خدمات کے نگران اعلیٰ ڈاکٹر عبداللہ بن عبدالعزیز الربیعہ نے بتایا کہ آپریشن چھ گھنٹے جاری رہا اور چھ مراحل میں مکمل ہوا۔ اس میں اینستھیزیا، بچوں کی سرجری، پلاسٹک سرجری اور دیگر معاون شعبوں کے 23 کنسلٹنٹس، ماہرین، نرسوں اور تکنیکی عملے نے حصہ لیا۔

ڈاکٹر الربیعہ کے مطابق دونوں بچیاں سینے اور پیٹ سے جڑی ہوئی تھیں اور دل کی جھلیاں، جگر اور آنتیں مشترک تھیں۔

یہ مراکش کے جڑواں بچوں کی علیحدگی کا چوتھا اور پروگرام کا 73واں آپریشن ہے۔ 35 برس سے زائد عرصے پر محیط اس پروگرام نے 28 ممالک کے 159 کیسز کا جائزہ لیا ہے۔ ڈاکٹر الربیعہ نے کہا کہ یہ انسانی اور طبی میدان میں مملکت کے قائدانہ کردار کا ثبوت ہے، جو خادم حرمین شریفین شاہ سلمان بن عبدالعزیز آل سعود اور ولی عہد و وزیر اعظم شہزادہ محمد بن سلمان بن عبدالعزیز آل سعود کی براہ راست سرپرستی سے ممکن ہوا۔

انہوں نے پوری ٹیم کی جانب سے شاہ سلمان اور ولی عہد کا فراخدلانہ تعاون پر شکریہ ادا کیا، جس کی بدولت مملکت اس شعبے میں عالمی مرکز بن چکی ہے، اور اپنے ساتھیوں کی کاوشوں کو سراہا۔

جڑواں بہنوں کے اہل خانہ نے بہترین طبی نگہداشت پر شاہ سلمان اور ولی عہد کا شکریہ ادا کیا اور طبی ٹیم کی محنت کی تعریف کی۔