خادم الحرمین الشریفین شاہ سلمان بن عبدالعزیز آل سعود نے اپنے ذاتی خرچ پر دنیا کے مختلف ممالک سے 1000 مرد و خواتین معتمرین کی میزبانی کی منظوری دے دی ہے۔ یہ میزبانی وزارتِ اسلامی امور، دعوت و ارشاد کے زیرِ انتظام ’’خادم الحرمین الشریفین مہمان پروگرام برائے حج، عمرہ و زیارت‘‘ کے تحت ہوگی۔

پروگرام 1448 ہجری کے دوران چار مراحل میں مکمل کیا جائے گا۔ پہلے مرحلے میں 16 ایشیائی ممالک کے 250 معتمرین شامل ہیں جن میں انڈونیشیا، مشرقی تیمور، فلپائن، ملائیشیا، کمبوڈیا، تھائی لینڈ، ویتنام، میانمار، لاؤس، سنگاپور، چین، جاپان، جنوبی کوریا، ہانگ کانگ، تائیوان اور منگولیا شامل ہیں۔

وزیرِ اسلامی امور، دعوت و ارشاد اور پروگرام کے نگرانِ اعلیٰ شیخ ڈاکٹر عبداللطیف بن عبدالعزیز آل الشیخ نے اسلام اور مسلمانوں کی خدمت پر خادم الحرمین الشریفین اور ولی عہد و وزیراعظم شہزادہ محمد بن سلمان بن عبدالعزیز آل سعود کا شکریہ ادا کیا۔

انہوں نے کہا کہ یہ میزبانی مسلم اقوام کے درمیان اخوت کے رشتوں کو مضبوط کرتی ہے اور دنیا بھر کے علما، مشائخ اور بااثر شخصیات سے رابطے کے پل قائم کرتی ہے۔

وزیر نے بتایا کہ آغاز سے اب تک 140 سے زائد ممالک کے مہمان اس پروگرام سے مستفید ہو چکے ہیں، اور وزارت نے اپنی تمام صلاحیتیں بروئے کار لائی ہیں تاکہ مہمان عمرہ ادا کر سکیں، مسجدِ نبوی اور اسلامی و تاریخی مقامات کی زیارت کر سکیں اور علما و ائمۂ حرمین سے ملاقات کر سکیں۔