سعودی پریس ایجنسی (ایس پی اے) کے مطابق اے ایف سی ایشین کپ سعودی عرب 2027 کی مقامی آرگنائزنگ کمیٹی نے ٹورنامنٹ کی میزبانی کے لیے مملکت کی تیاری کی تصدیق کی ہے۔ 7 جنوری 2027 کو شروع ہونے والے مقابلوں کے لیے 100 دن کی الٹی گنتی شروع ہو گئی ہے، اور یہ پہلا ایشین کپ ہے جو سعودی سرزمین پر کھیلا جائے گا۔

کمیٹی کے مطابق تیاریاں آپریشنل مرحلے میں داخل ہو چکی ہیں اور میزبان شہروں اور اسٹیڈیمز میں انتظامی کام جاری ہے۔ ٹائٹل کے لیے 24 قومی ٹیمیں مدمقابل ہوں گی۔

ایشین فٹبال کنفیڈریشن کے صدر شیخ سلمان بن ابراہیم آل خلیفہ نے ایشین کپ کی تاریخ کے سب سے بڑے ایڈیشن کی میزبانی کی کوششوں پر سعودی قیادت و حکومت، آرگنائزنگ کمیٹی اور سعودی فٹبال فیڈریشن کا شکریہ ادا کیا۔ انہوں نے کہا کہ 100 دن کا یہ سنگ میل ظاہر کرتا ہے کہ مملکت اسٹیڈیمز کے معیار سے لے کر شائقین کے تجربے تک اعلیٰ ترین معیار کے مطابق منصوبے پر گامزن ہے۔

آرگنائزنگ کمیٹی کی چیف ایگزیکٹو مَی الہلابی نے بتایا کہ آٹھ اسٹیڈیمز کی تیاری منصوبے کے مطابق جاری ہے اور 50 سے زائد ادارے ایک ٹیم کی طرح کام کر رہے ہیں تاکہ شائقین کو آمد سے روانگی تک بہترین تجربہ مل سکے۔ انہوں نے کہا کہ مملکت ان دنوں جدہ میں 27ویں خلیجی کپ کی میزبانی بھی کر رہی ہے۔

ٹورنامنٹ سے قبل مختلف سرگرمیاں جاری رہیں گی، جن میں تیاریوں پر مبنی فلم، آفیشل میسکوٹ کی رونمائی اور ٹورنامنٹ کی آفیشل صوتی شناخت کا اجرا شامل ہے۔ مملکت میں مقیم فٹبال شائقین کے لیے یہ ایشیا کی بہترین ٹیموں کو قریب سے دیکھنے کا موقع ہوگا۔