የሳዑዲ ዓረቢያ ጠቅላላ የመንገዶች ባለሥልጣን ከ8 ጎረቤት አገሮች በየብስ የሚመጡ ሐጃጆችን ለመቀበል 10 ዋና መንገዶችን አዘጋጅቷል። መንገዶቹ በዓለም አቀፍ ከፍተኛ ደረጃዎች መሠረት የተነደፉና የተሻሻሉ ሲሆን የትራፊክ ፍሰትንና የተጓዦችን ደህንነት ለማረጋገጥ የተቀናጁ የደህንነት ሥርዓቶች ተገጥመውላቸዋል። ይህ ሥራ የባቡር፣ የወደብና የአውሮፕላን ማረፊያዎችን የሚያካትት የትራንስፖርት ሥርዓት አካል ነው።

ከምሥራቅ፣ የኩዌት ሐጃጆች ሁለት መንገዶች አሏቸው፤ በአል-ኸፍጂ፣ ኑዐይሪያና ሪያድ በኩል ወደ መካ የሚወስደው 1473 ኪሎ ሜትር፣ በአር-ሪቅዒ፣ ሐፍር አል-ባጢንና አል-መጅመዓ በኩል ያለው ደግሞ 1277 ኪሎ ሜትር ነው። የተባበሩት ዓረብ ኤምሬትስ ሐጃጆች በአል-በጥሓ፣ ሰልዋ፣ አል-ሁፉፍ፣ ሪያድና ጣኢፍ በኩል 1514 ኪሎ ሜትር፣ የቀጣር ሐጃጆች 1385 ኪሎ ሜትር ይጓዛሉ። የባሕሬን ሐጃጆች በንጉሥ ፋህድ ድልድይ በኩል ወደ ኸበር፣ ከዚያም ሪያድና ጣኢፍ አልፈው ወደ መካ በግምት 1320 ኪሎ ሜትር ይጓዛሉ።

ከሰሜን፣ የዮርዳኖስ ሐጃጆች ሁለት መንገዶች አሏቸው፤ ከሓለት ዐማር መግቢያ በታቡክና መዲና በኩል 1219 ኪሎ ሜትር፣ ከአል-ሐዲሣ በአል-ቁረያትና ሰካካ በኩል ደግሞ 1545 ኪሎ ሜትር። የኢራቅ ሐጃጆች በጀዲደት ዐርዐር፣ ዐርዐር፣ ሰካካና መዲና በኩል 1579 ኪሎ ሜትር ይጓዛሉ።

ከደቡብ፣ የየመን ሐጃጆች በአል-ወዲዓ፣ ነጅራንና አብሃ በኩል 1372 ኪሎ ሜትር ይጓዛሉ። የኦማን ሐጃጆች ደግሞ በሩብዕ አል-ኻሊ በረሃ በኩል የሚያልፈውን 2150 ኪሎ ሜትር መንገድ ይጠቀማሉ፤ ይህም ከሁሉም መንገዶች ረጅሙ ነው።

ባለሥልጣኑ ወደ ሁለቱ ቅዱሳን መስጊዶች የሚወስዱ መንገዶችን አስቀድሞ በመገምገም የአስፋልት ማደስ፣ የአሸዋ ክምር ማስወገድ፣ የጎርፍ መውረጃዎችን ማጽዳትና የመከላከያ አጥሮችንና የማስጠንቀቂያ ምልክቶችን ደህንነት የማረጋገጥ ሥራዎችን አከናውኗል።

እነዚህ ሥራዎች በዓለም አቀፍ የመንገድ ምዘና ፕሮግራም (IRAP) ደረጃ መሠረት የደህንነት መስፈርቶችን ለማሟላት የሚደረጉ ጥረቶች አካል ሲሆኑ፣ የመንገድ ዘርፍ ፕሮግራም በዓለም የመንገድ ጥራት መለኪያ ስድስተኛ ደረጃ ላይ ለመድረስና የሞት መጠንን ለመቀነስ ያለመ ነው።